“Ky libër u kushtohet të gjithë njerëzve të besimit monoteist,
me dëshirën për të respektuar dhe, njëherësh,
për të jetuar në paqe me njëri-tjetrin.”

LINDJA E MESME, “RRUGËTIM” DELIKAT DHE ME PËRGJEGJËSI
Lexova me shumë kënaqësi librin e Dr. Faruk Borovës, “Rrugëtimi i një Ambasadori në Lindjen e Mesme”, me kujtime nga detyra e tij e lartë si ambasador i Republikës së Shqipërisë në Egjipt dhe në gjashtë vende të tjera të Lindjes së Mesme. Me thënë të drejtën, ndjeva një kënaqësi të veçantë, jo vetëm për faktin se më solli në kujtesë kohën kur edhe unë isha ambasador në ato anë, por edhe për një sërë fenomenesh e ngjarjesh që kanë ndodhur dhe vazhdojnë në këtë rajon nevralgjik, si dhe për perceptimet e tij, si përfaqësues i vendit tonë në shtete me peshë në arenën ndërkombëtare, ashtu dhe të personaliteteve të larta, të cilëve ka pasur fatin t’u paraqesë “Letrat Kredenciale” e të këmbejë me ta mendime rreth marrëdhënieve të ndërsjella, si dhe për probleme të ndryshme mbi zhvillimet në këtë zonë dhe në botë. Nga kjo pikëpamje, mendoj se autori, me çiltërsi dhe objektivitet, ka sjellë një informacion të bollshëm për gjithçka ka parë gjatë këtij “rrugëtimi” delikat dhe me përgjegjësi, duke dhënë një ndihmesë të çmuar në historinë e diplomacisë shqiptare, ku libra të tillë me kujtime janë shumë të pakta. Si i tillë, ai u shërben diplomatëve tanë të rinj sot dhe atyre që do të vijnë. Po ashtu, të dhënat që jepen në libër për çdo vend të veçantë dhe liderët e tyre, kanë një kolorit të fortë historik, që u shërben lexuesve të gjithë niveleve, për t’u njohur më mirë me Lindjen e Mesme, me popujt e saj, mbartës të një kulture nga më të lashtat në botë, siç është ajo egjiptiane, me zhvillimet ekonomike e politike të vendeve të veçanta dhe të zonës në përgjithësi, me marrëdhëniet midis këtyre vendeve, por edhe midis tyre dhe botës tjetër. Një vend të veçantë zënë në libër marrëdhëniet midis Izraelit dhe Palestinës si dhe midis Izraelit dhe vendeve arabe në përgjithësi. Faruku është ambasadori i parë shqiptar që shkeli Lindjen e Mesme, pas ndryshimit të sistemit në vitin 1990 dhe, natyrisht, takimi dhe bisedat me të ishin me ngarkesë njohëse edhe nga ana e pritësve dhe e bashkëbiseduesve të tij, të interesuar për zhvillimet politike e shoqërore në vendin tonë. Ai është i pari që ka paraqitur ”Letrat Kredenciale” si ambasador shqiptar në Izrael dhe Palestinë, duke hyrë në historinë e marrëdhënieve të vendit tonë me këto dy vende. Dr. Faruku jep me shumë vërtetësi vizitat dhe takimet në secilin prej këtyre dy vendeve, por edhe ndjenjat që e turbullonin, për shkak të historisë tragjike të konfliktit të tejzgjatur midis tyre, pavarësisht se në origjinë janë vëllezër nga një grup i vetëm njerëzor. Po ashtu, nga pozitat e një intelektuali dhe politikani bashkëkohor, në këtë libër ai përpiqet dhe arrin të japë një panoramë të marrëdhënieve fetare në Lindjen e Mesme, ku e kanë burimin të tria fetë hyjnore: ajo hebreje, kristiane dhe islame. Duke folur për këto fe, ai nuk harron të na kujtojë se si lindën krahë për krah njëra-tjetrës, si u zhvilluan dhe ku kanë arritur, duke u ndalur edhe në ekstremizmin fetar që ka ngritur krye këto vitet e fundit. Nga pozitat e një dashamiri të sinqertë, ambasador Faruku bën thirrje për paqëtim midis ndjekësve të këtyre feve si dhe për vendosjen e marrëdhënieve miqësore midis Izraelit dhe Palestinës, nga njëra anë, dhe Izraelit e vendeve të tjera arabe, nga ana tjetër, duke theksuar se në Lindjen e Mesme ka vend për jetesë paqësore për të gjithë popujt dhe besimet e tyre fetare. Parë në prizmin e asaj që shtjellova më sipër, nuk më mbetet tjetër, veçse të uroj autorin për këtë libër të vlefshëm dhe kam besim se ai do të pritet mjaft mirë nga lexuesit shqiptarë, por edhe nga lexues të tjerë që interesohen për Lindjen e Mesme dhe popujt e saj.

Ambasador Sulejman Tomçini